Një studim i publikuar në revistën Occupational & Environmental Medicine ka zbuluar se puna mbi 52 orë në javë mund të shoqërohet me ndryshime strukturore në tru, veçanërisht në zonat që lidhen me kujtesën, emocionet dhe vendimmarrjen, shkruan Korrespodenti.
Studiuesit përdorën skanime MRI për të krahasuar punonjës shëndetësorë që punonin orë të gjata me ata që kishin orar standard dhe identifikuan dallime të dukshme në vëllimin e disa rajoneve të trurit.
Sipas portalit SciTechDaily, ndryshimet u vunë re në rajonin middle frontal gyrus, i cili lidhet me kujtesën punuese, vëmendjen dhe aftësinë për zgjidhjen e problemeve.
Ekspertët theksojnë se këto ndryshime nuk përfaqësojnë domosdoshmërisht dëmtime të pakthyeshme, por mund të jenë përgjigje neuroadaptive ndaj stresit të vazhdueshëm. Megjithatë, pasojat afatgjata për shëndetin mendor dhe njohës mbeten ende të paqarta.
Raportimi i Neuroscience News shpjegon se ky lloj transformimi në tru i ngjan reagimeve që shihen te traumat kronike, ku truri përpiqet të kompensojë ngarkesën e vazhdueshme.
Kjo ngre shqetësime të reja mbi ndikimin e kulturës së punës së tepërt në shëndetin e individit. Përveç ndryshimeve në tru, puna e tejzgjatur prej kohësh lidhet me rritjen e rrezikut për sëmundje kardiovaskulare, çrregullime metabolike dhe probleme të shëndetit mendor.
Organizata Botërore e Shëndetësisë (OBSH) ka paralajmëruar që orët e gjata të punës janë një nga faktorët kryesorë të rrezikut për vdekje nga sëmundje të zemrës dhe goditje në tru. Sipas një raporti të vitit 2021 nga OBSH dhe Organizata Ndërkombëtare e Punës, punonjësit që punojnë mbi 55 orë në javë kanë një rrezik dukshëm më të lartë për këto probleme shëndetësore.
Studiuesit theksojnë se nevojiten kërkime të mëtejshme për të kuptuar nëse këto ndryshime strukturore në tru janë të kthyeshme apo nëse çojnë në dëmtime afatgjata. Për momentin, gjetjet shtojnë një arsye tjetër pse balanca mes punës dhe jetës duhet të konsiderohet një prioritet i rëndësishëm për shëndetin publik. /Korrespodenti