Sporti

Shaqiri me dy asistime ndihmon Zvicrën të triumfojë ndaj Belgjikës, siguron vendin e parë në grup

Përfaqësuesja e Zvicrës ka befasuar të gjithë duke fituar ndaj asaj të Belgjikës me rezultat 5-2 në Grupin 2 të Ligës A në kuadër të Ligës së Kombeve.

Vendasit ishin më të mirë, besuan te fitorja dhe në fund me meritë e arritën.

Goli i parë në takim erdhi nga mysafirët, Thorgan Hazard shënoi në minutën e dytë, pastaj nuk vonoi edhe i dyti në minutën e 17-të.

Vendasit u përgjigjën me dy gola të shpejtë për pesë minuta, fillimisht nga pika e bardhë shënoi Ricardo Rodiguez (26′), pastaj Haris Seferovic (31′) pas asistimit nga Xherdan Shaqiri.

Zvicra kaloi në epërsi në minutën e 44-të me golin e Seferovic dhe me rezultatin 3-2 përfunduan 45-të minutat e parë.

Ishte Shaqiri edhe një herë që doli në skenë, këtë herë duke asistuar për 4-2 te Nico Elvedi (62′).

Seferovic kompletoi het-trikun në minutën 84, Shaqiri ishe pjesëmarrës në aksion, duke pasuar bukur topin me thembër te asistuesi Kevin Mbabu.

Pas kësaj fitore Zvicra e përfundoi grupin në vendin e parë me nëntë pikë, aq sa Belgjika, por me gol dallim më të mirë. Në vendin e fundit mbeti Islanda me asnjë pikë.

Tani Zvicra do të vazhdojë tutje në Ligën e Kombeve ku do të luajë në gjysmëfinalet me fituesit e grupeve nga Liga A. Kundërshtari i radhës do të mësohet me anë të shortit me 3 dhjetor.

Vendin e parë tashmë e kanë siguruar Portugalia dhe Anglia, tani ka mbetur Franca/Holanda. /Telegrafi/


SHIKO EDHE: Mësoni si bëhet testi i COVID-19?