Sporti

Kërkohen arsye jashtë ringut për t’ia rrëmbyer Khabibit titullin

Vetëm pak orë pas triumfit në oktagonin e “T-Mobile” në Las Vegas, kampioni i peshave të lehta në UFC, Khabib Nurmagomedov, mund të humbasë titullin.

Lajmi ka ardhur nga vetë presidenti i kësaj disipline, Dana White, i cili ka qenë i shpejtë për të shprehur pakënaqësinë e tij rreth kaosit që shpërtheu pas duelit, gjë që mund të detyrojnë Federatën të anulojë dhënien e titullit për kampionin rus.

“Nëse Khabib merr një pezullim shumë të gjatë, ai mund të humbasë rripin e tij”, pranoi White.

“Unë kam folur me Conor dhe ai është në rregull, ai është më i mërzitur për luftën dhe jo për atë që ndodhi pas saj”, shtoi White.

Tre anëtarë të stafit të Khabib u arrestuan nga policia pas duelit, por u liruan pasi McGregor nuk preferoi të denoncojë rastin në organet kompetente.

Presidenti i UFC-së gjithashtu zbuloi se pse ai nuk ia dha rripin Nurmagomedov brenda tetëkëndëshit.

“Nga frika se turma do përfundonte në oktagon dhe kështu ne vendosëm se ishte më mirë të dilnim të gjithë”, tha ai.

Nurmagomedov fitoi mëngjesin e djeshëm (me orën tonë lokale) titullin e peshave të lehta në UFC pasi mposhti në raundin e katërt kundërshtarin Conor McGregor, por pas atij episodi, në oktagon u futën disa persona nga stafi i kampionit rus, duke u konfliktuar me stafin dhe duke goditur kundërshtarin irlandez.

Por vlen të përmendet se ishte vet stafi i McGregor që nxiti këtë konflikt pasi që të parët kishin sulmuar autobusin e Khabib, por edhe e kishin fye atë, duke ia sharë babanë, kombin, por edhe fenë.

Federata duhet të ketë parasysh këtë dhe të marr masa ndaj kundërshtarit të Khabib, i cili edhe njihet për arrogancë ndaj rivalëve sportivë.