Lajme

Zyrtare: Bashkim Jashari, komandant i ri i Forcës së Sigurisë së Kosovës

Presidentja e Kosovës, Vjosa Osmani ka emëruar gjeneralmajor Bekim Jasharin komandant të ri të Forcës së Sigurisë së Kosovës, shkruan Reporteri.net.

Emërimi i tij ka ndodhur bazuar në ligjin për FSK-në.

Osmani gjithashtu ka dekretuar lirimin nga detyra të komandantit të deritanishëm të FSK-së, gjenerallejtënant Rrahman Rama pas paraqitjes së dorëheqjes së tij.

Ky është njoftimi i plotë:

Presidentja e Republikës së Kosovës, Vjosa Osmani, njëherësh komandante supreme e Forcave të Sigurisë së Kosovës, ka emëruar gjeneralmajor Bashkim Jasharin komandant të ri të Forcës së Sigurisë së Kosovës, në përputhje me kompetencat kushtetuese.

Emërimi është bërë siç parashihet në ligjin për FSK-në, pas propozimit të ministrit të Mbrojtjes dhe rekomandimit të kryeministrit të Republikës së Kosovës.

Para emërimit të komandantit të ri të FSK-së, Presidentja e Republikës së Kosovës, mbështetur në dispozitat ligjore, ka dekretuar lirimin nga detyra të komandantit të deritanishëm të FSK-së, gjenerallejtënant Rrahman Rama, pas paraqitjes së dorëheqjes nga ana e tij.