Lajme

Vuçiç shpall fitoren: Kemi marrë më shumë se 2 milionë vota

Aleksandar Vuçiq, udhëheqësi i listës “Aleksandar Vuçiq – për fëmijët tanë”, iu drejtua publikut pas zgjedhjeve të së dielës në Serbi dhe tha se ishte krenar, sepse partia e tij fitoi një fitore bindëse.

“Fituam një besim të madh të njerëzve në kushte kur pak prej tyre besuan se mundemi. Ky është një moment historik. Ne morëm më shumë se 2 milionë vota, të cilat nuk janë regjistruar deri më tani”, ka thënë ndër tjerash ai në fjalimin e tij.

Sipas mediave serbe, përcjell Telegrafi, ai tha se Partia Progresiste Serbe dhe partnerët e saj të koalicionit fituan kudo, nga Çikago, Berna, Vjena, Soçi dhe se OSBE pritet të numërojë votat nga Kosova, ku sipas tij ka pasur një pjesëmarrje rekord.

“Ne kemi fituar kudo që kemi humbur. Ne kemi fituar në çdo vend jashtë Serbisë. Ne fituam aty ku nuk fituam kurrë. Kështu që ne morëm 90 për qind të votave në Republikën Srpska”, ka thënë më tej ai në fjalimin e tij.

“Në këtë moment, ne kemi 63.4 për qind, dhe presim që kur të vijnë nga vendet e huaja, ne do të kemi mbi 64 për qind të votave”.

Zgjedhjet në Serbi u mbajtën në kohën e pandemisë së koronavirusit. Qytetarët gjatë procesit të votimit u detyruan të vendosnin maska dhe të mbanin distancë fizike.