Lajme

Pinë duhan në sallë, përplasen fortë Vjosa Osmani dhe Besa Gaxherri

Ligji për Duhanin i ka përplasur në Kuvend të Kosovës kryeparlamentaren Vjosa Osmani dhe deputeten e LDK-së, Besa Gaxherri, raporton Gazeta Express.

Pas reagimit të kryeparlamentares Vjosa Osmani që ka paralajmëruar deputetët që po pinë duhan në sallë, ka reaguar Gaxherri.

Sipas deputetes së LDK-së, këto informacione Osmanit ia ka dërguar një deputete e PDK-së të cilën nuk e ka përmendur me emër.

“Nuk është e vërtetë që t’i solli administrata informatat, po deputetja e PDK-së, që nuk boni hiç mirë. Edhe një herë sugjeroj që vërtet deputetët të kenë atë mirëqenien, sepse ne nuk kemi mundësi me dalë në oborr me pi duhan. Ligji ju obligon me kriju hapësira, na duhen kushte për punë në radhë të parë”, ka thënë Gaxherri.

Megjithatë, Osmani ka deklaruar se nuk ia ka dërguar fotografitë deputetja e PDK-së.

“Asnjë deputete e PDK-së nuk më ka dërguar asnjë fotografi, ato kontakte kush i keni me njëri-tjetrin është e juaja. Është një deputete tjetër që më informoi, e pastaj kërkova nga administrata që ta konfirmoj e pastaj reagova. Për aq sa jam informuar dhe meqë kam qenë në Kuvend, nuk ka paraparë as për objektet hoteliere, tjetër send është që ato po e shkelin ligjin”, tha kryeparlamentarja.