Lajme

Pas takimit me Thaçin, Pompeo i reagon ashpër Rusisë

Sekretari amerikan i Shtetit, Mike Pompeo i ka reaguar Rusisë lidhur me kapjen e tri anijeve ukrainase në detin e Zi të dielën. Ka thënë se ky incident paraqet shkelje të ligjeve ndërkombëtare.

Pompeo ka lëshuar një komunikatë lidhur me situatën e tensionuar në Ukrainë, vetëm disa minuta pas takimit që pati me presidentin e Kosovës, Hashim Thaçi, në Shtëpinë e Bardhë në Uashington.

Në deklarimin e Pomepos thuhet se “SHBA-ja shpreh shqetësim të thellë për incidentin që ndodhi më 25 nëntor në Detin e Zi”.

“Shtetet e Bashkuara të Amerikës e dënojnë këtë aksion agresiv të Rusisë. Ne i bëjmë thirrje Rusisë t’ia rikthejë Ukrainës anijet e saj dhe të respektojë sovranitetin e Ukrainës dhe integritetin territorial të saj brenda kufijve të saj të njohur ndërkombëtarisht”, thuhet në letrën e Pompeot.

Ndërkaq, Departamenti Amerikan i Shtetit njoftoi rreth një orë më parë lidhur me takimin e Pompeot me presidentin e Kosovës, Hashim Thaçi; takim ky që u mbajt prapa dyerve të mbyllura në Shtëpinë e Bardhë.

Thaçi, përmes një komunikate të lëshuar nga Zyra e Presidentit të Kosovës, u shpreh se me sekretarin Pompeo ka biseduar lidhur me mundësinë e arritjes së një marrëveshje paqësore mes Kosovës dhe Serbisë. /Insajderi.com


SHIKO EDHE: 10 teknologjitë e lashta për të cilat shkenca ende nuk ka përgjigje