Mustafa ende në gjendje jo të mirë shëndetësore, shkon për herë të parë në tubim me Vjosa Osmanin

Kryetari i LDK-së, Isa Mustafa, është parë sot për herë të parë në përkrahje të kandidates së LDK-së për kryeministre Vjosa Osmanit.

Mustafa ka marrë pjesë në tubimin e LDK-së që po mbahet në Ferizaj. Nga aty, ai ka thënë se ndonëse ende nuk është në gjendje të mirë shëndetësore, megjithatë ka vendosur që të jetë i pranishëm në këtë bastion të LDK-së në përkrahje të kandidates së tyre për kryeministre Vjosa Osmani, shkruan Reporteri.net.

“Vjosa e ka përkrahjen e plotë të gjitha organeve të LDK-së, përkrahjen e degëve dhe besoj shumë e se e ka përkrahjen e shumicës së qytetarëve të Kosovës. Sot po më bindni se meritojmë edhe më shumë, nga prezenca juaj, entuziazmi që po tregoni”, ka thënë shkurt Mustafa.

Ndërkohë, kandidatja për kryeministre nga radhët e LDK-së, Vjosa Osmani ka thënë se sot është bindur në fitoren e pakontestueshme të LDK-së në zgjedhjet e 6 tetorit.

“Sot në Ferizaj po e shoh fitoren e pakontestueshme të LDK-së në këto zgjedhje. Sot po e shoh që përfundimisht po e çojmë PDK-në në opozitë dhe çdo parti që e ka degraduar shtetin. Të jeni të bindur që më 6 tetor nuk ka asgjë që mund ta ndalë fitoren e LDK-së. Por të jeni gjithashtu të bindur që nuk do të ju zhgënjejmë. Ne dallojmë nga të gjithë të tjerët në këtë garë për ta udhëhequr Kosovën. Përderisa të tjerët i kanë dyert të mbyllura në botë, LDK e ka çdo derë të hapur. Ne kemi program qeverisës të bazuar në ekspertizë, të realizueshëm që në qendër e ka familjen kosovare”, ka thënë ndër të tjera Osmani. /Reporteri.net