Lajme

E konfirmuar: Kosova ftohet nga SHBA në Samitin për Demokraci

Kosova do të marrë pjesë në Samitin e Demokracive të organizuara nga SHBA-ja.

Siç mëson Kanal 10 ftesa për vendin tonë vjen pas serisë së takimeve që ditët e fundit ka zhvilluar në Uashington, presidentja e Kosovës, Vjosa Osmani.

Raportimi fillestar për mosftesën kishte shkaktuar reagime të shumta të opozitës, që e panë këtë si dështim të qeverisë aktuale. Samiti, ku tani merr pjesë edhe Kosova mbahet në fillim të muajit dhjetor.

Se Kosova të ftohet në Samitin për Demokraci ka raportuar edhe Zëri i Amerikës.

Sipas Zërit të Amerikës s’ka konfirmim zyrtar akoma dhe se Departamenti i Shtetit su ka kthyer përgjigje atyre lidhur me këtë çështje.

Gazeta prestigjioze Politico kishte publikuar listën e shteteve që presidenti Biden kishte ftuar për të marrë pjesë në Samitin për Demokraci më 9 dhe 10 dhjetor, por që Kosova nuk përfshihej në të.

Një grup i organizatave joqeveritare nga Kosova, ka kërkuar përmes një letre që, Shtetet e Bashkuara të shqyrtojnë thirrjen e Kosovës për të marrë pjesë në Samitin për Demokraci, të organizuar më 9 dhe 10 dhjetor nga presidenti amerikan, Joe Biden.

Vërtetësinë e kësaj letre e ka konfirmuar për Radion Evropa e Lirë njëri nga nënshkruesit e saj, Agon Maliqi, kryetari i bordit të platformës jofitimprurëse, Sbunker.

“Ne jemi të vetëdijshëm për kontekstin delikat të sigurisë në Ballkan, që prodhon ndarje të thella etnike dhe shpesh paqëndrueshmëri. Megjithatë, duke pasur parasysh përparimin e vazhdueshëm që Kosova ka bërë gjatë viteve për të ndërtuar demokraci, por edhe raportet e posaçme mes popullit të Kosovës dhe të Shteteve të Bashkuara, ne besojmë se Kosova meriton të jetë pjesë e kësaj iniciative strategjike dhe do të përfitonte nga e njëjta”, thuhet në letër.

Samiti për demokraci do të ketë tri tema kyçe: mbrojtjen kundër autoritarizmit, adresimin dhe luftimin e korrupsionit dhe avancimin e respektimit të të drejtave të njeriut.

Pas takimit të parë dhe konsultimeve në të, Biden do të ftojë liderët botërorë sërish, që të diskutojnë rreth përparimit të bërë.


SHIKO EDHE: Mësoni si bëhet testi i COVID-19?