Lajme

Diplomati Bosch propozon tre emra për president të Kosovës

Diplomati holandez, që ka shërbyer si ambasador në Kosovë, Robert Bosch, ka propozuar tre emra për Presidenti të Kosovës, të cilët, sipas tij, do të ndihmonin të arrihej një kompromis mes LDK’së dhe Vetëvendosjes dhe do t’i hapte rrugë krijimit të qeverisë së re.



Bosch thotë se po përcjell nga afër zhvillimet e fundit në Kosovë, e për pikën ku LDK e VV s’po arrijnë të merren vesh, ish-ambasadori i Holandës ka disa propozimez.

Emri i parë që Bosch ka propozuar është ai i ish-presidentit të Kosovës dhe ish-kreut të LDK’së, Fatmir Sejdiut.

“Fatmir Sejdiu mund të jetë një kompromis i mirë në pozitën e presidentit, edhe pse ky funksion nuk është i lirë edhe për një kohë. Ai ka esperiencë, është i pavarur dhe nuk është i angazhuar në ndonjë parti”, ka shkruar diplomati tanimë i pensionuar.

Ndërkaq ai si të denjë për pozitën e presidentit, që zgjedhet në vitin 2021, e sheh publicistin Veton Surroi dhe ish-ambasadoren e Kosovës në Holandë, Vjosa Dobrunën.


“Dy të tjerë, që janë krejtësisht të pavarur, më shkuan në mend si kandidatë të shkqëlqyer: Veton Surroi dhe Vjosa Dobruna. Të dy me përvojë në vend dhe ndërkombëtarisht. Ata do ta përmirësonin imazhin e vendit”, ka shkruar Bosch.

“Jam i sigurt se ka kandidatë të tjerë të përshtatshëm, por duke ndjekur lajmet në baza ditore, s’mund të qëndroja pa u përfshirë pak”, ka shkruar tutje ish-ambasadori i Holandës.