Lajme

Çfarë mund të presë Gjermania nga një president si Biden?

Fitorja e Joe Bidenit në zgjedhjet presidenciale në Shtetet e Bashkuara të Amerikës u përshëndet në Gjermani menjëherë pasi u bë e njohur.

Kancelarja Angela Merkel i uroi Bidenit “nga zemra fat dhe sukses”.

“Miqësia jonë transatlantike është e pazëvendësueshme, po të duan të përballojmë sfidat e mëdha të kësaj kohe”, shkroi Merkel në një profil të Twitterit, të shpërndarë nga një zëdhënës i Qeverisë.

Lehtësimi që ndihet në këto fjalë të kancelares shpjegohet me të panjohurën e madhe, që i priste marrëdhëniet midis Gjermanisë, Evropës dhe SHBA-së me një mandat të dytë të Donald Trumpit.

Ai pason habinë fillestare në Gjermani, pas prognozave të para kur u mbyllën kutitë e votimit. Të gjitha sondazhet paraprake sugjeronin një fitore të thellë që në krye për Joe Bidenin. Por mbyllja e kutive të votimit tregoi pa pritur se sa e madhe vazhdon të jetë në SHBA mbështetja për Donald Trumpin.

Me gjithë fitoren e dukshme të Bidenit, rezultatet që njihen të këtyre zgjedhjeve presidenciale qartësuan edhe një fakt: se zgjedhja e Donald Trumpit president, katër vjet më parë, nuk ishte aksidentale. Triumfi i Trumpit qe kurorëzimi i një zhvillimi në SHBA e në botë, jo shkaktari i tij.

Rezultatet konfirmojnë se SHBA janë të ndara thellësisht. Bideni potencon faktin se ka fituar mbi 74 milionë vota të popullit. Kurse Trumpi, i përgatitur tani për një betejë ligjore për rezultatet, thotë se me 71 milionë vota, ai ka marrë më shumë vota se çdo president tjetër i SHBA në detyrë.

Sidoqoftë, mbështetja masive, e papritur jashtë SHBA-së, për Trumpin tregoi se për miliona vetë në vend janë të pranueshme qëndrime, sjellje, veprime të politikanëve, për të cilat në Evropën demokratike politikanët do të skualifikoheshin.

Opinioni publik në Gjermani dhe në Evropë është shumë i ndjeshëm. Për shembull, për raportin publik që kanë liderët me të vërtetën, me faktet, apo për qëndrimin që mban një lider ndaj njerëzve me ngjyrë apo me fe tjetër.

Kurse në SHBA një pjesë shumë e madhe e amerikanëve të bardhë shohin si urgjente çështje të tjera.

Duket se ata kanë frikë se po u ikën nga duart kontrolli mbi vendin e tyre: përballë emigrantëve të vjetër e të rinj, ata mendojnë se shtete të huaja apo organizma të fuqishme po i mashtrojnë amerikanët, se problemet që kanë ata burojnë nga fakti se elita politike e ekonomike në SHBA vazhdon të pasurohet.

Në këto shqetësime ka elementë të justifikuar e të vërtetë. Por kjo nuk është kryesorja. Fakt që është që deri para Trumpit pakkush i kishte bërë shumë amerikanë të bardhë, kryesisht njerëz të thjeshtë, të besonin se mund t’u zgjidhen këto halle.


SHIKO EDHE: Mësoni si bëhet testi i COVID-19?